خلال حلولها ضيفةً على برنامج “قعدة ستات” الذي تقدّمه الإعلامية مروة صبري عبر شاشة قناة “القاهرة اليوم”، كشفت الفنانة داليا إبراهيم حقيقة ما تم تداوله عن اعتزالها الفن، بعد ابتعادها عن الوسط الفني لعشر سنوات.
وقالت داليا: “أنا معتزلتش الفن، أنا قعدت في البيت من عشر سنين وبعدت عن الوسط خالص، مش عارفة إيه اللي حصل ولكن جالي اكتئاب، وعالجت ده بالبعد عن الوسط الفني ودوشة الشهرة، وقلت ده يمكن حل من الحلول ولقيتني بتاخد، واشتغلت في حاجات تانية وقلت يمكن أعرف أشتغل في حاجة تانية غير الفن ومجهوده يكون أقل شوية، لقيتني مش مبسوطة، الفن برضو حاجة جميلة”.
وأضافت: “أنا مبعدتش عن الفن تماماً ولكني كتبت سيناريوهات لما لقيت نفسي مش عارفة أطلّع طاقة حبّي للفن في إيه، وكتبت روايات وهو ده اللي شدّني”.
وعن سبب إصابتها بالاكتئاب، قالت داليا إبراهيم: “استعنت بدكاترة وأدوية علشان أتعالج من الاكتئاب، ومجاليش اكتئاب بسبب الوسط الفني ولا جالي إحباط، بالعكس أنا كنت في عز شغلي، لأ دي حاجة في كيمياء المخ ولكن مش كهرباء في المخ، ودي حاجة جاتلي واتعالجت منها”. وأضافت: “وقت ما جالي اكتئاب كنت بشتغل في مسلسل وهو متعرضش لغاية دلوقتي، وحصل مشكلة ولكن قلت عادي، ومش ده سبب الاكتئاب”.