بعد النجاح الكبير الذي حققه مسلسل “الهرشة السابعة” كشفت بطلة العمل الفنانة أمينة خليل، عن أنها لم تتخوف من فكرة الإنجاب بعدما قدمت معاناة شخصية نادين في المسلسل، والتي كانت أمًّا لتوأم خلال أحداث العمل.
وعلقت أمينة في تصريحات صحافية قائلة: لم أتخوف من هذا الأمر إطلاقًا، لأن لو حد خاف من المسلسل لازم يبص جوة ويشوف هو خايف ليه، أنت عندك عقدة محتاج تحلها وتعالجها”.
وأضافت: “الأحسن إنك تشوف اتعلمت إيه من المسلسل وإزاي تتفادى الهرشة السابعة، لأني مؤمنة جدًا بالنظرية دي وإلا مكنتش عملت المسلسل، بس مقتنعة إن هي ممكن تبقى في أي سنة في الجواز، فنتعلم من المسلسل إزاي نتفادى الوقوع في الهرشة السابعة”.
وتطرقت أمينة في حديثها عن شخصية نادين التي جسدتها في المسلسل قائلة: “نادين شخصية مدية نفسها الحق أنها تحكم على الناس وتنتقدهم لكن في الآخر رفعت المراية قدام نفسها واعترفت بعيوبها، وهي دي الطبيعة البشرية، إن مفيش حد ملاك ولا شيطان، كلنا في الجزء الرمادي”.
وأوضحت: تعاطفت مع نادين في حتة أنها أم لتوأم دي حاجة تخلي أي أم تتجنن، والمشهد اللي هي بتقول أنا عايزة استحمى كانت بتتكلم بجد بانهيار وممكن تنفجر”.
وعن شخصية آدم التي جسدها الفنان محمد شاهين خلال أحداث المسلسل قالت: “تعاطفت مع آدم أنه كل ما كان بيعملها حاجة حلوة كانت تعلق وتعترض، وهو كان متلخبط فكان لازم تشرحيله الموضوع اللي هو مش عارفه وتستحمليه، لأن غريزة الأمومة عندنا كستات لكن مش عنده، هو مش فاهم فلازم تعلميه من غير ما تحسسيه إنك بتديله درس في الأدب والأخلاق”.
وعن معرفتها بما هي الهرشة السابعة، والتي تم اختيار اسم المسلسل على أساسها، قالت: “أعرف يعني إيه الهرشة السابعة من صحباتي بيقولولي إيه اللي حصل فاكرة زمان أيام الفرح كنا مبسوطين إزاي واكتشفت أن ده رأس موضوع مهم جدًا لازم نتكلم فيه، والأهم هنتناقش فيه إزاي لازم يروح بين إيدين حد بيفهم وحنين في معالجة الموضوع ومش منحاز، حد يقدر يدي وجهة النظر من الناحيتين الستات والرجالة، بحيث المتفرج يبقى متفهم وجهة نظر الست والرجل وإننا شايفين الاتنين معاهم حق”.