خلال استضافته في برنامج “أجمد 7 الساعة 7” الذي تقدّمه المذيعة جيهان عبدالله عبر أثير إذاعة “نجوم إف إم” والمعروض على “يوتيوب”، أعلن الفنان عمرو مصطفى عن تصالحه مع الفنان رامي صبري، بعد حجبه أغنية الأخير “يمكن خير” من قناته الرسمية في “يوتيوب”.
وبدأ عمرو مصطفى كلامه بالقول: “آخر الموضوع ده، أنا عايز بس أقول لرامي حاجة؛ لأنه صديق ليا لو غلطت فيك هعتذر ومش هاخجل، وهبقى فخور بيا، مش هنام بليل وأنا مضايق حد؛ لأن موضوع مغرور ده سببلي مشاكل كتير مع الجمهور، لغاية ما تطاولوا عليا ومكنش ينفع يحصل معايا، نجاح خمسة شهور من حياتي المهنية في بداياتي هي بالتاريخ بتاعكو كلكو، هل ده غرور؟ لا حقيقة وبالأرقام”.
وأضاف: “لو حد يجي يقولي مينفعش تقول كده؟ طب ما انتو استباحتوا ألحاني، كان ممكن يقولي يا عمرو مخدتش بالي وهعديها، بعلم الأجيال الجاية مينفعش حد ياخد مني ألحان بالشكل ده، هو الموضوع تصاعد لما جه وقال أنا وأنا، وأقعده في البيت، مين اللي يقعّد مين في البيت؟ إزاي جات في خياله، جات إزاي؟ بليغ حمدي خريج إيه؟ مهو خريج حقوق”.
وتابع: “إمبارح بالليل قسماً بالله وأنا بعمل الفيديو ده كنت متضايق ولحد دلوقتي متضايق، عايز أقوله أهدى القصة مش أنت، هما بيشغلوني بيك، هما ثلاثة معروفين في الوسط الموسيقي منهم اتنين مش موجودين وواحد بيسخنهم وبسك عليه، وأنا معنديش مشكلة في صفحة جديدة، أقسم بالله يا رامي نجاحك من نجاحي، مش هروح أرفع قضية، أنا بحب البني آدم ده، ومينفعش حد يبوظ هيبتي، عيب، بعترف إنك اكتر واحد بتدافع عني، حصل خير يا رامي، متفرحش الناس فينا واقفل الموضوع، ولو كان خاني التعبير عشان ولادك وولادي متزعلش بس الكلام اللي قولته كان صعب، أنت بردو بتتحارب وعارف ده كده”.
وردّ عليه رامي صبري في مداخلة هاتفية مع البرنامج نفسه قائلاً: “أنت عارفني من زمان جداً مش بتاع مشاكل متخليهمش يسحبونا لمشاكل، أنت راجل ملحن وعظيم ومن قبل ما اشتغل في الشغلانة وأنت نجم في المزيكا وبنفتخر إن فيه فنان زيك في مصر… بس الاختلاف في الطريقة بتاعت الاختلاف، ودخلت بيتك وعيشنا واشتغلنا، فيه حتة إن لو رامي أخد مني حاجة أو فيه شبه… إحنا بنتكلم على الواتس أو التليفون، أنا عمري ما هطلع أغلط فيك أو متضايقتش منك، أتضايق من الأسلوب في الكلام عليا… عشان أكيد ليا مكانتي وليا جماهير في الوطن العربي”.
وأضاف: “لما حد زميل يقلّل مني أنا كمان مش هحب أطلع اتكلم على حد مهم زيك كده، أنا متبسطش؛ لأني أحب أظهر وسط الناس بالاحترام، إنما إحنا لازم نبقى قدام الناس المعلمين للجيل الجديد حتى لو بينّا خلاف… اختلفت مع محمد رحيم في 2013 عشانك وبدافع عنك في الوسط الفني وقدّام الناس كلها وبقول ده أحسن واحد في العالم وده لحد إمبارح، ولحد إمبارح لما اتعلقت الأغنية بقول أكيد مش عمرو”.