فاجأ الفنان حسام داغر جمهوره بإعلانه شراء غرفة نوم الفنانة الراحلة سامية جمال، ضمن مزاد علني أُُقيم لها.
وعبّر داغر عن سعادته باقتناء غرفة نوم نجمة الرقص الشرقي الراحلة، حيث قال: “أنا كنت من عشاق سامية جمال فحبيت إن حاجة زي دي تكون عندي وأقدر أحافظ عليها، فلما اتعرضت عليا في المزاد شوفت تفاصيل جمالها، فيها تفاصيل فنية تليق بفنانة كبيرة زيها”.
وأضاف: “لما اتعرضت في المزاد قولت ممكن ناس كتير متقدّرش قيمة الجمال ده، ولكن لقيت إن كان في منافسة قوية وكان في كذا جامع للتُحف، كانوا داخلين معايا المنافسة بس رسيت عليا الحمد لله، الأوضة قيّمة فعلاً ولها قيمة فنية، والخشب الزان اللي معمولة منه برضه قيّم، فليها كذا قيمة مش مجرد قيمة إنها كانت خاصة بالراحلة سامية جمال”.
وأوضح حسام داغر أنه يهوى تجميع الأنتيكات منذ زمن بعيد، قائلاً: “أنا عموماً من الناس اللي بتحب تجمع أنتيكات، دي هواية عندي، وبحب أشتري لوحات لفنانين مشاهير، لكن إني أشتري قطعة كاملة لحد معروف كانت أول مرة المرة دي”.
واختتم حديثه قائلاً: “طبعاً قيمة الغرفة المالية كانت كبيرة وده شيء طبيعي، بس الحاجات دي بتكون غير معلنة، وفي الآخر قيمة الحاجة بتكون أكبر بكتير من اللي دافعينه فيها”.