كشف الفنان محمد محمود عبد العزيز عن علاقته بزوجته وتفاصيل لقائهما قبل الزواج، كما تحدث عن ابنته تمارا، مشيراً إلى أن زوجته جزائرية- فرنسية، وأن لقاءهما كان صدفةً ولم يكن متوقعاً.
وقال عبد العزيز خلال تصريحات صحافية: “مش مقصود إنها ما تكونش مصرية لكن في حاجات كتير مشتركة بينا، منها علاقتنا بأهلنا وطريقة حياتنا واعتماد كل واحد على نفسه ومفيش حد منتظر حاجة من حد”. وأضاف: “كنت بتكلم معاها شخصياً من قريب وقلت لها التركيبة دي جت إزاي مش فاهم لأن احتمالية إننا نتعرف على بعض كانت واحد في المليار، ووقتها سافرت فرنسا 4 أيام وهناك عرفتها ولما رجعت فضلت العلاقة موجودة وكنا بنتكلم، وبدأت العلاقة تكبر ويحصل ارتباط وجواز، وتخلل ده كورونا وماكنّاش عارفين نشوف بعض لكن ربّك لو رايد حاجة هتحصل”.
وتحدث محمد محمود عبد العزيز عن ابنته قائلاً: “تمارا الفقرة الكرتونية في حياتنا، ولسة بحاول أتعرف عليها لحد دلوقتي، وحساباتي اتغيرت وبدأت أتطرق لأفكار كتير ما كنتش بتيجي في دماغي وبحاول أعمل حاجات لنفسي وعيلتي وشايل عبء على دماغي، لأن وجود طفل أو طفلة مرتبط بيكي وباسمك وكيانك وتاريخك حمل كبير، وعاوز أعملها كل حاجة حلوة مني عشان تبقى عارفة إن أبوها راجل محترم وبيحب بلده ومراته”.
وعمّا تعلمه من والده ويريد أن يعلمه لابنته، قال: “في حاجات والدي ما قالهاش لكنه زرعها فينا بشكل غير مباشر وفي نصايح مباشرة زي إنه قال لي عاوز تمثل أهم حاجة في التمثيل إنك ما تمثلش، لكن في نصائح غير مباشرة زي موقف حصل اتصرف فيه إزاي أو حاجة ليها علاقة بخير أو حب بلدي، وعمره ما قال لي صلّي بشكل مباشر لكن كان بيصلي قدامي”.