خلال لقائه في برنامج “صاحبة السعادة”، الذي تقدّمه الفنانة إسعاد يونس عبر شاشة قناة DMC، كشف الفنان ماجد الكدواني سر الكيمياء بينه وبين صديقه المقرّب الفنان كريم عبد العزيز، كما تحدّث عن أولى تجاربه الكوميدية فيلم “حرامية في كي جي 2″، والذي تعرّف من خلاله الى كريم عبد العزيز.
وقال الكدواني: “كريم عبد العزيز برج الأسد، وبرج الأسد قيادي وبينسى نفسه علشان يحل مشاكل الآخرين، وبيستمتع بتحمل المسؤوليات، وأنا برج القوس، والقوس هلهلي عيل وعايز يرمي على حد ومن هنا في كيمياء عجيبة بيني وبين كريم عبد العزيز من يوم ما اتقابلنا”.
وأضاف: “كريم عبد العزيز دايماً يقول إحنا مش أصحاب ولا إخوات، إحنا مصروفين لبعض، ومن يوم ما اتقابلنا أنا حاسس إني مرمي في حضن حد حنين وأمين وبيخاف عليا، وحساس أوي في مشاعره وحساس تجاهي أوي، فبقيت بعشقه، وبنتي وهي صغيرة كانت بتقولي هتجوز كريم عبد العزيز، وهو تركيبة إلهية”.
أما عن أولى تجاربه الكوميدية، فقال ماجد الكدواني: “أنا كنت مرعوب من الكوميدي، أنا جبان في الكوميديا جداً، وخايف من الإفيهات المباشرة وعايز استخبى في موقف، ولاقيت كريم عبد العزيز قالي أنا حاسس بيك وأنا زيّك بخاف من المباشرة، تعالى نستخبى في الشخصية ونصدّقها، ولو ضحكنا تمام، لو مضحكناش أدينا متصدقين”. وأضاف: “وبدأنا نمشي في هذا المنهج اللي بقى منهجنا في الحياة، وكريم دايماً يترعب من فكرة إنه يقول إفيه وميضحكش، ودايماً كان بيحتويني، وأنا برتاح وأنا جنبه”.