كشفت المخرجة إيناس الدغيدي الأسباب التي دفعتها للغياب عن الساحة الفنية لأكثر من 14 عاماً، منذ فيلمها الأخير “مجنون أميرة”، مشيرةً إلى أنها تتمنى تقديم موضوعات جريئة مهمة، بالقول: “أنا بقالي فترة مبتعدة عن السينما؛ لأني كان ليا بصمة ونفسي أعمل السينما اللي بحبها مش اللي الجمهور عايزها، ونفسي أقدّم موضوعات جريئة عن العلاقة بين الرجل والمرأة والمشاكل الاجتماعية المهمة، ولكن أنا مبحبش الأكشن ولا الكوميديا اللي بدون هدف”.
وعن أزمتها مع الفنان مصطفى هريدي، قالت الدغيدي: “زمان كنت بشتغل مع نجوم كبار وكان بيحصل بينّا مشاكل وعمرنا ما طلعناها برا لأن الشغل بيكون كله مشاكل، ودلوقتي مش هبص للموضوعات الصغيرة دي”.
أما عن أسباب زيارتها الأخيرة إلى لبنان، فقالت: “كنت بسمع حاجات مش حلوة عن لبنان ولكني لما جيت لاقيتها زي ما هي، وشعبها بيحب الحياة وعايزين يعيشوا وبيتحدوا جميع الظروف”.
وكانت إيناس الدغيدي قد أثارت جدلاً واسعاً بعدما تحدثت عن الفارق في الوسط الفني بين الحاضر والماضي، قائلةً: “الوسط الفني اتغير دلوقتي كتير عن زمان؛ لأن زمان الأفلام كانت حميمية أكتر حتى التعامل ما بينا كان فيه ود ومش مادي، لكن دلوقتي المادة بقت أساسية والناس بيتشغلوا عشان الفلوس فقط ومحدش بيعمل اسمه غير بفضيحة رغم إننا زمان كنا بنعمل أسماءنا عادي بشغلنا”.