خلال تقديمها برنامج “صبايا الشمس” الذي يُعرض عبر قناة “الشمس”، أشادت الإعلامية ريهام سعيد بالفنانة أنغام بعد التغريدة التي ردّت فيها على المتحدث باسم الجيش الإسرائيلي باللغة العربية أفيخاي أدرعي.
وقالت ريهام في البرنامج: “الأزمة دي بيّنت رجالة، ومن الرجّالة اللي الأزمة دي بيّنتهم أنغام اللي ردّت على أفيخاي مش كأنها فنانة هو ما يتقالوش غير ربنا ياخدك… وبقول دايماً إن الكلمة بتفرق على قد ما أنت مشهور وعلى قد ما أنت الناس بتحبك وعلى قد تأثيرك هيجي رد فعل… يعني لو أنا كتبتله مش هيعرف أنا مين لكن لما واحدة بحجم أنغام تكتبله هتفرق… أنا بنحني ليكي احتراماً”.
وتطرقت ريهام سعيد الى فيديو محمد صلاح الذي تحدث فيه عن الأوضاع في غزة إذ قالت: “التاني طالعلك في أوضة ضلمة ناكش شعره ومعرفش دا ذكاء اصطناعي ولا ملقنينه إيه، ميخدش أي موقف خالص مش بيقول ولا كلمة تقول إن اللي بيحصل دا غلط ومش صح، ساوى دي بدي، أنت بجد خليت القضيتين زي بعض؟ أنا أخدت تيشيرت محمد صلاح من ابني قطّعتها ورميتها وقولتله شجّع زيزو في الزمالك”.
كما تحدثت ريهام سعيد عن لقاء باسم يوسف مع بيرس مورغان، حيث قالت: “باسم يوسف دا اللي قاد حملة ضدي وكلّم المعلنين يسحبوا إعلاناتهم من البرنامج بتاعي بعد حلقة فتاة المول فالمفروض إني مش بحب باسم يوسف… لكن في اللقاء دا عمل اللي محدّش عرف يعمله، باسم ملوش مصالح معاهم هو عايش في وسطهم ففكرة إنه يطلع ويتحدّاهم وهو قاعد عندهم دي شجاعة غريبة”. وأضافت: “أنا اتعلّمت من باسم يوسف حاجة إنه مفرحش باللي اتقال عليه هو عرف اللعبة، هو عايز يقول إنه معملش كدا عشان الناس ترضى عنه”.